ສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ ພົບປະໂອ້ລົມປະຊາຊົນບ້ານແຜ້

ການເຄື່ອນໄຫວ, ສະພາປະຊາຊົນແຂວງຫົວພັນ

ວັນທີ 3 ສິງຫາ 2023 ນີ້, ທ່ານ ປອ ສະຖາບັນດິດ ອິນສີ ຊຽງໃໝ່ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ ພ້ອມທັງເປັນຮອງລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍທິມງານໄດ້ພົບປະໂອ້ລົມປະຊາຊົນບ້ານແຜ້, ໃນພິທີມີທ່ານ ວັນເພັດ ສີບຸນແສງ ຮອງເລຂາພັກເມືອງ ຜູ່ປະຈໍາການຊີ້ນໍາພັກ-ພະນັກງານ, ພາກສ່ວນກ່ຽວຂ້ອງຂັ້ນເມືອງເຂົ້າຮ່ວມນຳ.
ໃນພິທີ ຜູ່ເຂົ້າຮ່ວມໄດ້ຮັບຟັງບົດລາຍງານຫຍໍ້ຈາກທ່ານນາຍບ້ານ ໃຫ້ຮູ້ວ່າ: ບ້ານແຜ້ເປັນບ້ານຊົນເຜົ່າໄຕດຳ, ມີທີ່ຢູ່ອາໄສຢູ່ສອງຝັ່ງແຄມມ່າ ຮ່າງຈາກເທດສະບານເມມືອງແອດປະມານ 5 ກິໂລແມັດ, ອາຊີບຫຼັກແມ່ນເຮັດນາປູກເຂົ້າ ພ້ອມທັງເຮັດໄຮ່-ສວນ ປູກພືດຜັກ(ສາລີ-ມັນຕົ້ນ) ເປັນສິນຄ້າ, ລ້ຽງສັດນ້ອຍ-ໃຫຍ່ ເປັນອາຊີບເສີມ ສ້າງລາຍຮັບໃຫ້ຄອບຄົວ, ມີ 80 ຫຼັງຄາເຮືອນ 116 ຄອບຄົວ, ພົນລະເມືອງທັງໝົດ 486 ຄົນ, ຍິງ 242 ຄົນ.
ມີຫຼາຍບັນຫາຫຼັກໆທີ່ທ່ານໂອ້ລົມປະຊາຊົນ ເປັນຕົ້ນແມ່ນອະທິບາຍໃຫ້ປະຊາຊົນເຂົ້າໃຈຕໍ່ບັນຫາ-ເສດຖະກິດສັງຄົມ ເຊັ່ນບັນຫາເງິນເຟີ້, ສິນຄ້າຂຶ້ນລາຄາໃນປະຈຸບັນ, ຜົນສຳເລັດກອງປະຊຸມ ສະໄໝສາມັນຄັ້ງທີ 5 ຂອງສະພາແຫ່ງຊາດຊຸດທີ IX , ຊອກຫາວິທີທາງແກ້ໄຂຊີວິດການເປັນຢູ່ຂອງປະຊາຊົນຕະຫຼອດມາ, ທ່ານຍັງໄດ້ຮຽກຮ້ອງໃຫ້ພໍ່ແມ່ປະຊາຊົນຈົ່ງເປັນເຈົ້າການ ຮັກສາຄວາມສາມັກຄີບັນດາເຜົ່າ ໃຊ້ທ່າແຮງທີ່ມີຢູ່ຂອງບ້ານ ເປັນບ່ອນທຳມາຫາກິນ, ສ້າງສາພັດທະນາຊີວິດການເປັນຢູ່ຂອງຄອບຄົວ ແລະ ທ່ານໄດ້ເນັ້ນໃຫ້ມີຄວາມອຸ່ນອຽນທູ້ນທ່ຽງ ເຊື່ອໝັນຕໍ່ການນຳພາຂອງພັກ-ລັດ, ພ້ອມກັນແກ້ໄຂບັນຫາຕ່າງໆຂອງສັງຄົມໃຫ້ມີທ່າກ້າວດີຂຶ້ນຢ່າງແນ່ນອນ.
ໃນໂອກາດທ້າຍທ່ານໄດ້ແກ້ໄຂຄຳສະເໜີຂອງປະຊາຊົນ 2 ບັນຫາໃຫຍ່ ເປັນຕົ້ນແມ່ນຈະຊຸກຍູ້ໃຫ້ພາກສ່ວນກ່ຽວຂ້ອງກໍ່ສ້າງຊົນລະປະທານ ເພື່ອແກ້ໄຂບັນຫານ້ຳນາບໍ່ພຽງພໍ ແລະ ສຶກສາຄວາມເປັນໄປໄດ້ໃນການກໍ່ສ້າງຂົວອູ່ ເພື່ອການໄປມາຂອງປະຊາຊົນສະດວກຍິ່ງຂຶ້ນ ເປັນຕົ້ນແມ່ນແກ້ໄຂໃຫ້ນັກຮຽນໄປ-ມາໂຮງຮຽນໄດ້ໃນລະດູຝົນ ນ້ຳນອງ ແລະ ເພື່ອໃຫ້ປະຊາຊົນທີ່ອາໄສຢູ່ພາກກົງກັນຂ້າມກັບສະຖານທີ່ທຳການຜະລິດ ໄດ້ທໍາການຜະລິດທັນກັບລະດູການ.
ໃນວັນດຽວກັນນີ້ ທ່ານ ປອ ສະຖາບັນດິດ ອິນສີຊຽງໄໝ່ ພ້ອມດ້ວຍທິມງານຂັ້ນແຂວງ ແລະ ເມືອງ ຍັງໄດ້ພົບປະອຳນາດການປົກຄອງບ້ານດ້າຍ ກຸ່ມລ້ອງຫອຍ ເຄື່ອນໄຫວ ສັງເກດຄວາມເປັນໄປໄດ້ໃນການກໍ່ສ້າງຂົວອູ່ນ້ຳແອດຢູ່ຈຸດບ້ານດ້າຍ-ລ້ອງຫອຍ ຕື່ມອີກ ເພື່ອແນໃສ່ເຮັດໃຫ້ນັກຮຽນຢູ່ບ້ານດ້າຍ ແລະ ບ້ານນາໂຮມ ໄດ້ໄປ-ມາ ໂຮງຮຽນສະດວກ ພ້ອມທັງເຮັດໃຫ້ປະຊາຊົນໃນເຂດນັ້ນໄປມາຫາສູ່ກັນຢ່າງສະດວກສະບາຍ.