ທ່ານ ຮອງປະທານກຳມະທິການເສດຖະກິດ ແຜນການ ແລະ ການເງິນ ສະພາແຫ່ງຊາດເຂົ້າພົບທ່ານ ຮອງເຈົ້າແຂວງຫົວພັນ

ຕອນແລງຂອງວັນທີ 2 ເມສາ 2014 ຜ່ານມາ ທ່ານ ດຣ ບົວຄຳ ທິບພະວົງ ຮອງປະທານກຳມະທິການເສດຖະກິດ ແຜນການ ແລະ ການເງິນ ສະພາແຫ່ງຊາດ ພ້ອມດ້ວຍທີມງານ ໄດ້ເຂົ້າພົບທ່ານ ດຣ ຈັນແສງ ພິມມະວົງ ຮອງເຈົ້າແຂວງຫົວພັນ ຜູ້ຊີ້ນຳວຽກງານ ໃນຂົງເຂດເສດຖະກິດ, ເຊີ່ງ ທ່ານ ນ. ດຣ ບົວຄຳ ທິບພະວົງ ໄດ້ລາຍງານຈຸດປະສົງ ຂອງການມາຢ້ຽມຢາມ ແລະ ເຮັດວຽກຢູ່ແຂວງຫົວພັນ ຄັ້ງນີ້ ກໍ່ເພື່ອແນ່ໃສ່ລົງຕິດຕາມກວດກາການຜະລິດເປັນສິນຄ້າ ແລະ ການຈັດສັນທີ່ດິນ, ການນຳໃຊ້ທີ່ດິນກະສິກຳ ຈາກນັ້ນທ່ານ ດຣ ຈັນແສງ ພິມມະວົງ ໄດ້ສະແດງຄວາມຍີນຕ້ອນຮັບຢ່າງຈີງໃຈ ແລະ ທ່ານໄດ້ລາຍງານສະພາບການພັດທະນາ ເສດຖະກິດ–ສັງຄົມ, ການປູກ–ການລ້ຽງຂອງປະຊາຊົນບັນດາເຜົ່າຂອງແຂວງຫົວພັນ ຍົກໃຫ້ເຫັນ 5 ທ່າແຮງຂອງແຂວງຫົວພັນຄື: ທ່າແຮງດ້ານການປູກຝັງ, ທ່າແຮງດ້ານການລ້ຽງສັດ, ທ່າແຮງທາງດ້ານການຫັດຖະກຳ, ທ່າແຮງດ້ານການທ່ອງທ່ຽວ ແລະ ທ່າແຮງທາງດ້ານການຜະລິດພະລັງງານໄຟຟ້າ, ຖ້າຫາກ 5 ທ່າແຮງດັ່ງກ່າວໄດ້ຮັບການເອົາໃຈໃສ່ຢ່າງໃກ້ສິດຂອງຄະນະພັກແຕ່ລະຂັ້ນ ກໍ່ຈະເຮັດໃຫ້ແຂວງຫົວພັນ ນັບມື້ຫຼຸດພົ້ນອອກຈາກຄວາມດ້ອຍພັດທະນາເທື່ອລະກ້າວ.