ໃນຕອນເຊົ້າຂອງວັນທີ 28ພຶດສະພາ 2018ທີ່ຫ້ອງຮັບແຂກຫ້ອງວ່າການປົກຄອງແຂວງຫົວພັນ ທ່ານ ພູໂຊນ ທຳມະວີໄຊ ຄະນະປະຈຳພັກແຂວງ ຮອງເຈົ້າແຂວງຫົວພັນ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບຂອງ ທ່ານ ຮ້ວາງ ກວາງ ເລຶອງ ຫົວໜ້າຄະນະ ອົງການຜູ້ຕ່າງໜ້າກະຊວງຕຳຫຼວດແຫ່ງ ສສ.ຫວຽດນາມ ປະຈຳ ສ. ປ. ປ. ລາວ ພ້ອມດ້ວຍຄະນະ ເນື່ອງໃນໂອກາດທີ່ເດີນທາງມາ ເຄື່ອນໄຫວຢ້ຽມຢາມ ແລະ ເຮັດວຽກຢູ່ສາມແຂວງພາກເໜືອຂອງ ສປປ ລາວ ແຕ່ວັນທີ 23-31 ພະຈິກ 2018ນີ້.
ກ່ອນອື່ນ ທ່ານ ພູໂຊນ ທຳມະວີໄຊ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ສາມແຂວງພາກເໜືອຂອງ ຂອງ ທ່ານ ຮ້ວາງ ກວາງ ເລຶອງ ພ້ອມດ້ວຍຄະນະ ໃນຄັ້ງນີ້ ເພື່ອເປັນການປະກອບສ່ວນສໍາຄັນ ໃນການເສີມຂະຫຍາຍຮັດແໜ້ນ ສາຍພົວພັນຮ່ວມມືວຽກງານປ້ອງກັນຄວາມສະຫງົບທີ່ມີມາແຕ່ດົນນານ, ມູນເຊື້ອຄວາມສາມັກຄີພິເສດ ລະຫວ່າງ ສອງພັກ, ສອງລັດ ກໍ່ຄື ປະຊາຊົນທັງສອງຊາດ ລາວ-ຫວຽດນາມ ໃຫ້ໝັ້ນຄົງທະນົງແກ່ນຕະຫຼອດໄປ. ພ້ອມດຽວກັນນັ້ນ ທ່ານ ພູໂຊນ ທຳມະວີໄຊ ຮອງເຈົ້າແຂວງຫົວພັນກໍ່ໄດ້ລາຍງານສະພາບການພັດທະນາເສດຖະກິສັງຄົມຂອງແຂວງຫົວພັນ ແລະ ສະພາບການຮ່ວມມືຂອງບັນດາແຂວງຂອງ ສສ ຫວຽດນາມ ທີມີຊາຍແດນຕິດກັບແຂວງຫົວພັນ.
ໂອກາດດຽວກັນນີ້, ທ່ານ ຮ້ວາງ ກວາງ ເລຶອງໄດ້ສະແດງຄວາມຂອບໃຈຕໍ່ ໃຫ້ການຕ້ອນຮັບຢ່າງອົບອຸ່ນ ໃນຄັ້ງນີ້ ພ້ອມທັງ ແຈ້ງຈຸດປະສົງ ຂອງການມາເຮັດວຽກກັບ ພະແນກການທີ່ກ່ຽວຂ້ອງ ແລະ ທັງສອງທ່ານກໍ່ຍັງໄດ້ໂອລົມກັນບາງບັນຫາເຊັ່ນວ່າ: ວຽກປ້ອງກັນຄວາມສະຫງົບ, ວຽກງານການຄຸມຄອງຄົນຕ່າງປະເທດ ແລະ ການຄ້າຂາຍ, ການທຳການຜະລິດກະສິກຳຕິດເຂດເສັນສາຍແດນແນໃສ່ເຮັດໃຫ້ສອງພາກຊາຍແດນມີຄວາມສະຫງົບປອດໄພ.